Ṭinghmunah Tui leh Sanitation Inzirtirna Hun Hmang

Dt 5-6 April 2022 khan Er C. Chawnghnuna, Director, PMU (JJM) hoin Ṭinghmunah Tui Thianghlim  leh Faina (Sanitation) chungchang inzirtirna hun hman a ni. Er K.Zohmingliana, Project Manager, PMU leh Er Lalropuia Hmar EE, PHED, Er Hmangaihzuala SDO, PHED leh Vanlalsawma, JE, PHED ten an ṭawiawm. Tlai lamah khawtlang hruaitu, NGO leh Society-te nena inkawm hona hun hman a ni a, zan lamah Ṭinghmun Community Hall-ah  Vantlang Inkhawm (Gram Sabha) neiin Tui leh Sanitation inzirtirna leh sawi hona hun hlawkthlak tak hman a ni.

Mipui ṭangrual, Bialtu MLA hrang hrang leh MP hrang hrang te’n kum 2004 aṭanga an hmalak ṭanna zara Ṭing Dil ropui tak mai siam hlawhtlin a lo ni ta hi a lawmawmin he dil hian Ṭinghmun khaw mipuite mamawh tui in tur hnianghnar a pek mek bakah sangha khawina ṭha tak niin, zoram chhung leh pawn aṭang pawhin khualzin tam tak a hip mek a ni. Ṭing Dil hian Ṭinghmun khaw mipuite eizawnna ṭha zawk a pe mek a, an economy pawh nasa taka a chawikan zel beisei a ni. Chutih lain khaw chhung a dil zau tak thianghlim leh ṭangkai taka enkawl tur hian mipuite’n inzirtirna an la mamawh hle a, a vaukam (Catchment area) a thing leh hnim tual ṭote zuah a, dil a bawlhhlawh  paih lut lo tura inzirtir te, chhungkaw choka thli leh ek-in thlite’n dil tui a tih bawlhhlawh lohna’na Soak Pit siam te, Tui tinu lo tura lei laih loh leh tuihawk ven ṭhat dan te inhrilh hriat a ni.