Seling PWMU hawn a ni

PMU PHED

Ni 24th May, 2025 (Inrinni) khan Seling khaw rama Plastic Waste Management Unit sak thar chu Er. H. Duhkima, Engineer-in-Chief, PHED chuan a hawng a, he PWMU hi Swachh Bharat Mission (Grameen) sum hmanga sak niin, Seling khaw dai Zero Point hmun a awm a ni. He PWMU hian ruahman danin Darlawn leh Thingsulthliah RD Block huamchhunga khaw 35 te a huam ang a, bawlhhlawh ṭawihthei lo (dry waste) chauh lakkhawm a ni ang a, a hnuaia kan hmuh khuate hi he PWMU hian a huam ang.

Seling PWMU building hma lam
Building hnung lam

Darlawn RD Block huamchhungah;

  1. Chhanchhuahna
  2. E. Phaileng
  3. Hmuhnghak
  4. Kepran
  5. Khawpuar
  6. Khawruhlian
  7. Lungsum
  8. Mauchar
  9. N. Khawdungsei
  10. N. Serzawl
  11. N. Ṭinghmun
  12. N. Vervek
  13. Palsang
  14. Pehlawn
  15. Ratu
  16. Sailutar
  17. L. Sakawrdai
  18. U. Sakawrdai
  19. Sawleng
  20. Sunghluchhip
  21. Thingsat
  22. Vaitin
  23. Vervek (Damdiai)
  24. Zohmun
  25. Zokhawthiang

Thingsulthliah RD Block huamchhungah;

  1. Darlawng
  2. Seling
  3. Sesawng I
  4. Sesawng II
  5. Sesawng III
  6. Thingsulthliah I
  7. Thingsulthliah II
  8. Tlangnuam
  9. Tlungvel
  10. Tuikhurhlu

Seling PWMU hi a zau zawng, a building floor area – 5,020 sq. ft niin, March, 2024 aṭang khan Seling VC te nen hmalakna neih ṭan a ni a, hemi chungchanga ruahmanna neihte, a khaw huam chin tur khawtlang hruaitute nena inrawnkhawmna hun, Consultation Meeting pawh 15th & 17th May, 2024 khan a hunlaia Project Management Unit, PHED, Director, Er. H. Duhkima hova neih a ni a, khawtlang hruaitute kalkhawm pawmpuina neih a nih hnuah ruahmanna te chhunzawm tura remruat a ni.

October 2024 khan Mizoram Pollution Control Board (MPCB) aṭanga No Objection Certificate (NOC) hmuh a nih hnu hian November, 2024 khan fencing pawh khawih ṭan a ni a, hun rei vak lo a liam hnu, 13th January, 2025 khan a building sak hna thawh ṭan a ni bawk.

Seling PWMU hi tunah hian bungraw la thlen kim loh vanga hna kalpui nghal theih a la ni lova, khawl dah tur ruahmante chu :-

  1. Baling machine (single)
  2. Shredding machine
  3. Soft Plastic Shredder
  4. Double Chamber Baling Machine
  5. Conveyor belt

te an ni a, bungraw thlen kim veleh hmalak nghal tura ruahman a ni.

Hawnna inkhawm hi Er. H. Lalsiamliana , SE, Rural WATSAN Circle, Aizawl chuan kaihruaiin, Tv C. Lalhmangaihzuala, District Coordinator, SBM(G) hnen aṭangin Technical Report ngaihthlak a ni a, Er. C. Lalchawimawia, Sr. EE, RWDA, Er. H. Lallianmawia, Joint Secretary, PHED leh Pu R. Lalbiakliana, Chairman, WATSAN Committee, Seling te chuan thusawina hun an nei ve bawk. Khuallian Er. H. Duhkima chuan, “ Seling leh a bul khuate hi tunhma aṭanga faina leh thianghlimna lam ngai pawimawh em em leh a khua ang pawh a hma la hmasa pawl an ni a, an khawtlang hruaitute pawhin hetiang hmun phal taka an pek avangin an chungah lawmthu ka sawi a, tunhmaa kan lui tui thianghlim em em ṭhinte kha tunah chuan plastic hnawmhnawkin a chiahpiah nasat tak em avangin plastic bawlhhlawh sawngbawl hi kan tih makmawh a lo ni chho ve ta a ni. Faina lama nunphung thlak tur hian mipuite pawh a thlema thlemchhuah kan la ngai fova, thianghlimna hi kan nunpui a hun tawh takzet a ni” tiin a sawi.