Champhaiah Faina Ni lawmna leh Faina Hapta kharna hun hman a ni.

PHED Champhai

Champhai, October 2, 2024 (Nilaini) chawhnu dar 01:00 P.M ah I&PR Auditorium, CHANEM Building-ah Faina beihpui ‘Swachhata Hi Seva’ leh Faina Hapta 2024 (Cleanliness Week) kharna hun hman a ni a. Champhai Bawrhsap Pu VL Remliana chu khuallian niin he hun hi a hmanpui.

                        He hunah hian Champhai Bawrhsap Pu VL Remliana chuan faina chu changkanna hmahruaitu a ni tiin, “Kan chhehvel a lo fai theih nan mihringte kan fai hmasak a ngai a ni,” a ti a. Faina thlen kawnga a fawng chelhtu pawimawh tak chu nu ho an nih thu sawiin, inchhungkhur atanga faina bul tan chu hmasawnna mel lung pawimawh tak a ni, a ti.

                        Khuallian chuan khua a fai zel theih nan Village Council ten mawhphurhna pawimawh tak an neih thu sawiin, Village Council te chu faina chungchangah emaw, khawtlang hmasawnna tura thupek an chhuahah te khawng taka kal turin a fuih a. VC te chu an thupek zawm lo te hrem kawngah huaisenna nei tura chahin, dan leh thupek zahna chuan changkanna leh hmasawnna a thlen thin a ni tih hre reng turin a chah bawk.

                        He hunah hian Pu VL Remliana hian Aspirational Toilet, cheng nuai nga (Rs. 500,000) senga Khankawn Police Check Gate bula sak tur lungphum a phum nghal a. Aspirational Toilet sakna hmunhma phal taka a thlawna petu Pi VL Hmuchhuaki, Champhai Vengthlang chungah lawmthu a sawi.

                        He hun hi Pu Ngulzathuama, SDO (S) chuan kaihruaiin, Pu Benjamin Zalawma Ralte, DUDO hnen atangin Aspirational Toilet buatsaih tura hmalakna report bakah Cleanliness Week puala hmalakna hrang hrang report ngaihthlak a ni a. Pi Julie C.Mawii District Co-ordinator, Swacch Bharat Mission(Gramin) chuan Swachhata Hi Seva Fortninght chhunga khaw hrang hrangte hmaklakna sawifiahin WATSAN Committee, NFDP (Naupang Fai Duh Pawl) leh Swachhagrahi (Sanitation worker) hi khaw tina din a nih thu leh  anmahni kal tlangin mahni khua theuhah hnatlangte, Pledge (Faina Thutiam) lakte, Special Gram Sabha, Youth Connect, Rally, CSC tihfai bakah CTU (Cleanliness Target Units) Black Spot hi hmun 9 awmin tihfai hna thawh chak taka kalpui a ni a ti. Pu Thanchungnunga, SE, PHED Champhai Watsan Circle pawhin thu sawiin Veng, Sikul, Office leh Dawr fai intihsiaka endiktute hnen atangin thusawi ngaihthlak a ni bawk.

Faina Hapta pual hian Champhai khawpui chhunga Veng, Pisa, Sikul leh Restaurant te tan fai intihsiakna buatsaih a ni a. Lawmman dawngtute chu a hnuaia tarlante hi an ni:

Veng Fai lawmman

1.         Hmunhmeltha

2.         Tlangsam

3.         Champhai Vengthlang

Sikul  Fai lawmman

1.         Govt. Kanan Middle School

2.         Govt. GM High School

3.         Champhai HSS

Pisa  Fai lawmman

1.         Treasury Office

2.         District Education Office/ District Project Office Samagra Shiksha

3.         EE, Irrigation & Water Resource

Restaurant Fai lawmman

1.         Chawngthu Restaurant

2.         HC Gilgal Restaurant

3.         Sterling Café