WORLD WATER DAY 2023

World Water Day 2023 hi ram pum huapin Aizawl leh District hrang hrangah lawm a ni a, Public Health Engineering Department le Central YMA tangkawpin Aizawl khawpui ah pawh urhsun takin he hun hi hman a ni. Hemi programme ah hian khuallian atan Dr R Lalthangliana niin, Vanapa Hall ah hman a ni a, he hunah hian PHE, CYMA leh khuallian atangin thuchah tawi ngaihthlak a ni bawk. He hun denchhen hian ram pum huap intihsiakna buatsaih a ni bawk a, category hrang hrang-ah lawmman siam niin, hemi Ni hian sem a ni bawk.

Kum 1992 khan United Nations General Assembly chuan khawvelah hian tui duhkhawp leh thianghlim a awm zel theih nan tui awmsate awmze nei taka hman a tulzia leh chumi kawnga mi zawng zawng lungrual taka kan thawhho theihna turin Vau Thla ni 22 hi Khawvel Tui Ni atan alo ruat ta a. Kum 1993 atang khan khawvel pum huapin he
‘Khawvel Tui Ni’ hi hman ṭan a ni a, heta ṭang hian kumtin tui pawimawhna pho chhuak thei thupui thlang chhuakin urhsun taka hman alo ni ṭhin ta a ni. Kumin hian invawn thianghlim lam hawi nen kaikawpin thupui hman a ni a, thupui chu ‘ Chak zawka hmasawn (Accelerating change) ‘ tih a ni a. Hei hian a tinzawn ber chu tui leh invawn thianghlim kawnga chak zawka hmasawn hi a ni. Ram luah chin alo zau zel a, nasa takin mihring kan pung deuh deuh a, bawlhhlawh hnawksak leh hlauhawm a lo tam zel a, tui hmanna a sang tual tual ta a ni. Hetih mek lai hian tui mamawh a lo pung deuh deuh a, tuihna a lo kâm zual zel si, kan lui leh tuihna awm chhun ang ang pawh chu mihring vanga bawlhhlawh leh thli tenawm tak tak chhuak chuan mihring tan vek tûr hlauhawmah a chantir mek a ni. Kumin Khawvel Tui Ni auhla ber tur chu, ‘ tui leh invawn thianghlim kawnga hun khirh lai sut kian zel (solving water and sanitation crisis) ’ tih a ni a, he hmasawnna inher danglam mek hi a thlen china tichak zel turin mite hnenah hrilh chhawn zel hi mitin mawhphurhna alo ni zual ta em em mai a ni.

Mizoram chu Lal lal lai aṭanga mahni khaw ram chin fel taka inrelbawl ṭhin kan ni a, tun thlengin mahni khaw ram chhung lo leh huan atan kan in pe a, Lo pawh kan la theh ṭhin a ni. Mahni khaw ram chhung kan enkawlnaah hian kan tuihnar leh lui dungte vantlang ram atan zuah a, lui kam ramngaw awmsa humhalh leh ram lo bua tawh pawh ramngaw din thar leh tur lam hawia hmalak a ṭul tawh tak zet a ni. Ram hmasawnna chuan thil neih ati pung thur thur a, hnawmhnawk leh bawlhhlawh alo tam telh telh a, a hlauhawm tual tual bawk a ni. Ram hmel lanna chu faina lama kan thlen chin hi a ni fo a, mahni khua leh veng theuha bawlhhlawh senghawi leh sawngbawl zui dan hi a him ṭhat leh ṭhat loh ngun taka kan thlithlai reng hi a ṭul tak meuh meuh a ni. Mizoramin hmasawnna lam tluang a zawh mek lai hian tui leh faina hian hmun pawimawh lai tak a chang mek a, mi ṭhahnemngai tlemte kutah dah mai lovin kan zavaia lungruala kan ṭan tlan loh chuan faina tluangtlin a awm thei lo ang a, tui duhkhawp dawn tikni a awm lo thei mai dawn a ni.

Tui leh invawng thianghlim lamah hian hun khirh tak kan tawng chho mek a, he ram tuihna awmsa humhalha a thianghlimna venhim leh tihhmasawn hi a ṭul tak meuh meuh a, he hmasawnna inher danglam mek hi a thlen chin aṭanga tichak zel tur hian ram hmangaihna nen theih tawpin i ṭang sauh sauh ang u. Kan chenna khua leh veng daihnaia tuihna leh a ram chhunga luite humhalh ila, tuihna tipung zawngin mahni remchan dan ang angin hma la zel ang u. Mahni chenna ṭheuh kan vawn fai reng chuan Mizoram hi ram hrisel leh changkang ni thei khawpin kan la chawikang ngei ang.