World Environment Day 2025, hlawkthlak taka hman a ni
5th June, 2025 hi khawvel pum huapa United Nations in a kalpui ṭhin, World Environment Day a ni a, he ni denchhen hian PHE Department leh Central YMA ṭangkawp chuan Tuikual lui thenfai hnatlang a rel a, PMU, PHE Department office, MINECO tual zawlah khuhhawnna hman niin, Er. Zodinthari, E-in-C PHED chuan Khuallian niin he hun hi a hman pui a ni.
United Nation General Assembly chuan kum 1972 khan June ni 5 hi World Environment Day atan a lo puang tawh a, a kum leh 1973 atang khan thupui thlan bik neiin hman ṭan nghal niin, kumin hian “Ending Plastic Pollution Globally” tih chu thupui atan thlan a ni.
Er. Lalropuia, Director, Project Management Unit, PHED chuan inkhawm a kaihruai a, Er. Lalrinzuala, Secretary, PHED & CYMA Co-ordination Committee leh Pu Lalhmachhuana, CYMA, President-te atangin thusawi ngaihthlak niin plastic sawngbawl ṭhat loh hi kan chhevel atan a pawizia leh hman tlem a pawimawhzia kalkhawmte hnenah an chah a. Er. Ngentluanga, Chief Engineer, Zone I, PHE Department kaihhruaina hnuaiah thutiam (pledge) sawi rualna hun hman tel a ni bawk.
Khuallian chuan CYMA leh PHE Department kan thawk ho thei chu lawmawm a tih thu sawiin, Faina leh thianghlimna kawnga Mizoram in hma kan sawn zel theih nan, YMA leh PHE Department chuan thawhhona ṭha kan neih zel a pawimawh thu a sawi a, khuallian hian hnatlang turte vai liamin, tuikual lui leh a chhevel tih fai hnatlang neih chhunzawm nghal a ni.
He hnatlangpui-ah hian YMA aṭangin Branch pasarih – Tuikual North Branch YMA, Tuikual South Branch YMA, Dinthar Branch YMA, Chawnpui Branch YMA, Ainawn Branch YMA, New Capital Branch YMA leh Maubawk Branch YMA te atangin hnatlang an thawkchhuak a, Zira PC – SBM(G) Ambassador chuan hnatlan pui bawkin, Aizawl khawpui chhunga PHE Department officer-te leh staff hrang hrangte nen an vaiin mi 200 chuang an hnatlang a, bawlhhlawh lakkhawm zat hi chhut danin ton 7 vela rit a ni.
World Environment Day pual hian Mizoram hmun hrang hrangah PHE Department leh Village WATSAN Committee-te huaihawtin activities hrang hrang neiin hun hman a ni bawk a, luikawr, tuikhur leh tuallaia plastic bawlhhlawh thenfai hnatlang te, awareness campaign leh thingphun hnatlangte neiin hun hman a ni.
NFDP, Khualen
