SWACHHATA GREEN LEAF RATING SYSTEM

KAMKEUHNA

Tourism hi ram tam takin sum lakluhna hnara an hman mai bakah hnam ziarang chawi larna hmanraw pawimawh tak pakhat a nih thu kan hre chamchi tawh ngei ang. Mizoram pawn a kum telin khualzin a ngah chho ve telh telh a, kum khat chhungin mi nuai chuangin an rawn tlawh ve ta fo bawk. India ramchhung hmun thenkhat khualzinte tlawh nasat deuh bik hmun a awm a, mahsela an dai dar nasa lutuk ṭan mek, hei vang hian khualzinho hian hmarchhak lam an rawn hawi ṭan niin an sawi ṭhin. Engpawhnise, khualzinte hmunhma, tlawh chakawm tura thang that tir tur hian a hmunhma nawm piah lamah a fai a ngai a, keini lam kan chet fimkhur piah lamah khualzinte tladah taka an chet ngam loh tura hmunhma buatsaih kan thiam a ngai hle. Chumi thlentir tur chuan a taka beih piah lamah ruahmanna ṭha nen kan kar a ngai bawk.

He thil zulzui hian November, 2023 khan Department of Drinking Water and Sanitation leh Ministry of Tourism ṭangkawp chuan Travel for LIFE Campaign hnuaiah khualzinte chawlh hahdamna hmun, khualbuk hrang hrangte endikna tur dan thar, Swachhata Green Leaf

Rating System a duang thara, he thilin a huam tur chin chu resort, hotel, homestay leh khualzinte’n man chawia thlenna hmuna an hman tawh phawtte chu a huam ang. Heng khualbukte hian faina chungchanga an hmunhma an buatsaih dan thuah sawrkar laipui kaihhruaina hi an zawm that leh that loh tehna tur a ni ang a, ODF Plus model dinhmun nihna neitu khawtlang leh ram chu khualzinte lakah a chawivul bawk ang.

DANIN A HUAM TURTE:

He dan hian khualbuk zinga sawrkar enkawl emaw, vantlang enkawl emaw, mimal enkawl tawh phawt chu a huam vek ang a, chung zingah chuan, hotel, homestay, resort, dharmshala, lodge, inthiarna hmunhma nei camps emaw trekking group-te an ni ang. Hengte hi State SBMG team leh District SBMG team leh Tourism Department ṭankawpna hnuaia thlanchhuah hna thawh tur a ni.

KALPUI DAN TUR

He rating system kalpui dan tur hi ṭhuang thumin ṭhen a ni a, chungte chu Orientation Phase, Voluntary Declaration Phase leh Verification Phase-te an ni.

(i). Orientation Phase: Hun hmasa ber atan Orientation neih tur a ni a, Tourism Department-te nena ṭankawpna hnuaia khualbuk select ho chu workshop neih puia, kaihhruaina kalphung leh ziarang inhrilhhriatna hun neih tur a ni. Ruahman dan chuan State emaw District SBMG team-in heng hi district level leh division level-ah an huaihawt ang a, amaherawh chu remchan dan a zirin thil kalpui tur a ni.

(ii). Voluntary Declaration Phase: Endikna tur kaihhruaina hmangin heng khualbuk thlanchhuahte hian an mahniin parameter hmangin an lo inendik hmasa phawt ang a, mark an lo inpe ang. A tichiang turin thlalak leh video telin submit tur an lo ruahman fel bawk ang.

(iii). Verification Phase: District Committee lamin Current Certification Status (CSS) chu Verification Sub-Committee te endik turin an thawn ang a, khualbuk lamin rating an lo inpek ve ho chu endikna hmanrua hmangin an lo ennawn ve thung ang. Endikna hmanruaah hian thlalak, video leh mark an inpekna a tel vek ang. He phase bikah hi chuan mahni office dawhkana endik hna thawh mai bakah a tichiang tura a hmuna va endik (site visit) a tel tawh ang a, chu chu Verification Sub-Committee lam aiawh tih tur a ni.

Verification Sub-Committee hi Sub-Divisional Magistrate in a kaihruai ang a, team zingah hian SBM(G) lam mi emaw, Health Department lam mi leh sa emaw, Pollution Control Board mi leh sate emaw hetiang lam kaihhnawih department a tel awma a ngaih ho ruat an ni ang. District Committee hi thla hnih danah inhmuhkhawmna hun an nei ziah ang a, endikna an neih tawh ho thlirletna hun leh hmabak tul ngaihtuah hona hun an nei thin ang.

Survey atanga an thil hmuhchhuah hmangin District Committee-te chuan khualbuk ho Rating Certificate chu an tichhuak ang a, heng khualbukte hian chu Rating Certificate chu an khualbuk, an sumdawnna hmun branding atan an tarin an hmang thei ang a, ratings pek dan hi ‘1 leaf’, ‘3 leaf’, leh ‘5 leaf’ te a ni ang.

COMMITTEE DIN DAN TUR

(i). State-Level Committee: Chief Secretary kaihhruaina hnuaiah he Committee hi din a ni ang a, Tourism Department Secretary leh Rural Sanitation, Secretary-in charge te an tel bawk ang. State Mission Director, SBM(G) chu convener a ni ang a, Director, Tourism Department chu Member Secretary a ni bawk ang. He Committee chhungah hian a tul dana zirin temporary emaw permanent emaw in member a telh belh thei bawk ang. He Committee hi thla thum danah District Committee hmalakna ennawnin an thu khawm thin ang a, hmalakna tur tul dang a awm a nih chuan thurawn tur District Committee hnenah an pe thin bawk ang.

(ii). District Level Committee: District Committee hi District Collector kaihhruaina hnuaia din tur a ni a, District Council CEO, Chief Development Officer (CDO), District Development Officer (DDO) emaw an tlukpui awm mi Vice Chaiman atan ruat an ni ang a, District chhunga SBM(G) a thu ber chu Member Secretary a ruat a ni bawk ang. State sawrkar hnuaia district representative-te, Tourism Department lam mite, District Coordinator (SBM-G), Village Council lam aiawhte chu Committee member a tel tur an ni a, hei bakah hian Tourism industry kaihhnawiha pawl awm, Hotel Association, Travel Agents Association, Tour Operators Association, adt. te chu Chaiman tul tih dan a zirin Committee huang chhungah telh belh theih an ni bawk ang.

(iii). Verification Sub-Committee: Verification Sub-Committee hi Sub-Divisional Magistrate (SDM) hmalakna hnuaia kalpui tur a ni a, a hmuna endikna lam kaihhnawiha tel thei department hrang hrangte chu an tel ve bawk ang. Eg. SBM(G), Health Dept., Pollution Control Board, adt.Verification Sub-Committee hian

khualbukte Current Certification Status (CSS) chu an endik ang a, chumi hnuah report an buatsaih chu SDM hnena an submit hnuah, SDM hian a he rating hi District Committee ten final rating an neih theihna turin comment a pekna nen a submit chhawng ve leh ang.

SCORING METHOD

A bulpui berah chuan he system hian khualbuk ho faina lama hmasawnna an neih theihna tur a ni a, endikna pawh thlur thuma ṭhen niin Solid Waste Management (Bawlhhlawh sakhat sawngbawlna), faecal Sludge Management (Ek thli sawngbawl) leh Greywater Management (Tuichhe sawngbawl) te an ni. Endik dan tur hi hmun lia ṭhen a ni a, chungte chu:-

(i).Infrastructure: Faina kaihhnawiha an khawl bun emaw an thil neihte

(ii). Practice: Faina kawnga an chet fel dan.

iii). Awareness generation : Zirtirna mipuite laka an kalpui dan

(iv). Innovation : Faina kawnga chin dan phung dang an kalpui

Mark hmuh theih zat hi a vaiin 200 a ni ang a, heng zingah hian Faecal Sludge Management chuan mark 80 a pu ang a, Solid Waste Management in mark 80 leh Greywater Management in mark 40 ṭheuhte an pu ang.

Heng chawlhbuk thlanchhuahte hian a lo berah zaa 50 tal mark an hmuh a ngai a, an mark hmuh dan a zirin 1 leaf, 3 leaf leh 5 leaf te ratings pek an ni ang a, lawmpuinan Swachhata Green Leaf Rating certificate hmangin chinchhiahna thuziak pek an ni ang a, he certificate hi industry in branding ratings a pek ṭhin, Trip Advisor, OYO, bookings.com etc ah pawh tarlan a ni tawh dawn a, heng hmang hian booking ti duh ten faina kawnga an dinhmun tehfungah an hmang tawh dawn a ni. Heng thlanchhuahte hian anmahni pawn an website-ah in advertise nan he rating hi an tarchhuak thei bawk ang.