Prof. Lalnilawma, Minister hovin Khawvel Ek In Ni (World Toilet Day) hman a ni
Khawvel pum huapa United Nations in a kalpui ṭhin, World Toilet Day (Khawvel Ek In Ni) chu ni 19th November, 2024 khan Prof. Lalnilawma, PHED Minister hovin hman a ni a, a lawmna hun hi PHE Department leh Central YMA ṭangkawp buatsaihin Tourist Lodge, Chaltlangah neih a ni a, PHE Department chhunga official-te bakah Central YMA hruaitute leh khawpui chhung YMA Branch hruaituten hun hi an hmang hova, faina kawngah department dang thawhpui Social Welfare, H&FW, UD&PA, Education, RDleh LAD lam sawm a ni bawk a ni.
United Nations General Assembly chuan kum 2013 Sahmulphah Thla ni 19 hi ‘Khawvel Ek In Ni’ atan a lo puang a, hemi kum aṭang hian kumtin khawvel pum huapin thupui thlan bik neiin hman a lo ni ta a ni. He ni hi khawvel invawn thianghlimna lama hun khirh thleng chho mek hmachhawn tura mipui chawk phur thar tura inzirtir leh inhrilhhriatna hunah hman ṭhin a ni.
Khuallian Prof. Lalnilawma, PHED Minister ni bawk chuan ‘Kan hriselna leh kan changkanna hi kan ek inte nen a inkaihhnawih vek tih he ni pual hian mipuiten hre thar sela, sawrkar laipuiin kum 1986 aṭanga a lo kalpui tawh ramchhunga faina programme-ah a rawn tinbing ber chu ek in a ni a, kan inthiar dan leh kan ek dehral dante hian kan ei leh in zawng zawng bakah kan hriselna chena a kaihhnawih vek vang hian kan ngaih thutak a hun tawh takzet a. Fai leh thianghlimna kawngah hian sawrkar tha chakna chauh a tawk lova, sawrkar chuan assets hrang hrang sak hna pawh a thawk nual tawh bawk, mimal tinten hengte enkawlna kawngahte leh faina hrim hrimah mawhphurhna kan neih ṭheuh vang hian he ni kan hman hian mimal tin nunah faina lama hma kan sawn theih nan ṭha zawkin hna thawk se a duhawm takzet’ tih a sawi a ni.
World Toilet Day denchhen hian sawrkar laipui chuan rampum huapin December ni 10 thleng hian campaign kalpui turin ruahmanna a siam a, mimal leh vantlang inthiarna thawmṭhat leh cheibawl hnate thawkin, ek in him ṭha pawimawhna uar zawka inzirtirna hun atana he campaign hi hman tum a ni.
World Toilet Day inkhawmah hian PHED Secretary Er. Lalrinkima Hnamte chuan palai lawmna thu sawiin, Er. H.Duhkima, Director, PMU PHED chuan thupui sawi zauna hun a hmang a, Er. Lalrothanga, Engineer-in-Chief, PHED leh Prof. Malsawmliana, General Secretary, CYMA te pawn thusawina hun neiin, PHED officers leh staff-te bakah khawpui chhung YMA Branch hrang hrang hruaituten he hun hi an hmanpui a, hei bakah hian Swachhata Hi Seva, 17th September aṭanga 2nd October, 2024 chhunga neih taka district tihṭha chawimawina hun neih nghal niin, Lawngtlai District chu a tiṭha ber an ni a, Saitual District-in dawtin Aizawl District chu pathumna an ni bawk.
