JAL UTSAV CAMPAIGN : MAMIT

Dated : Mamit the 8th of November, 2024 : Vawiin chawhma dar 11 khan D.C Conference Hall, Mamit-ah Jal Utsav Campaign buatsaih a ni a, Pi Carolyn LB Khiangte, Addl. DC Mamit chuan he hun hi a kaihruai.

Pi Carolyn-i chuan he campaign hi India ramah district thlanchhuah bik 20-ah hman niin, chumi zinga Mamit District thlan a ni chu lawmawm a tih thu a sawi a. Training tura lo kal zirtirtu te chuan dinhmun pawimawh tak an chelh thu sawiin zirlaite an kal zelna tura tui renchem a tul zia leh ruah tui dawn khawl pawimawhna zirtir a tul thu a sawi bawk.

He hunah hian Pu James Lalngilneia, Technical Manager, District Laboratory, Mamit PHED chuan Field Testing Kit hmangin tui thianghlim leh thianghlim loh test dan a entir a, hemi zawhah hian Pi Vanlalrintlaki, Health & Wellness Officer, Mamit Sub-Centre chuan kut sil fai dan zirtirna a pe bawk. Pi Lalduhsangi, District Co-ordinator, SBM(G), Mamit PHED chuan lawmthu sawina hun hmangin hun khar a ni.

Jal Utsav Campaign hi National Jal Jeevan Mission leh Ministry of Jal Shakti bultum niin, ni 15 chhung 6th November-24th November thleng hman tur a ni a, India ram a district 20 thlan chhuahah he campaign hi kalpui a ni. He campaign in a tum ber chu tui humhalh pawimawhna inzirtir te, tui renchem dan leh mipui vantlang tui humhalh chungchanga thawhho that te hi a ni.