FAINA PALAI ATAN ZIRA PC

Ni 22nd August, 2024 khan Mizo thalaite zinga youtuber lar leh social activist ni bawk, Mizo thalaite zinga adventure sports lam thehlartu PC Lalnunzira, Zira PC tia hriat lar chu Swachh Bharat Mission (Grameen),Mizoram Brand Ambassador atan Er. H. Duhkima, Mission Director, SBM-G Mizoram chuan a ruat a, faina lama Mizoram thingtlang khuaten hma an sawn lehzual theih nan,zirtirna pein Faina Palai a ni ang.

Palai nihna inruatna hun hi Project Management Unit,PHE Department Office,MINECO-ah neih niin, hun kaihruaitu Er. H. Duhkima chuan “Mizoram chhungah faina lama zirtirna nasa taka kalpui mek a ni a, changkanna lam kan pan mek rual hian zirtirna mamawh kan la tam em avang hian nasa lehzuala hmalak kan la ngai a, heti lam zirtirna a thahnem ngai tak mai thlan awm tak kan thawhpui thei tur hi kan lawma,duhsakna sang ber nen tha taka kan thawh ho ka beisei” a tih thu a sawi.

Zira PC hian SBMG hmalakna chungchang mipuite hnena puanzar a, Mizorama faina in hma nasa lehzuala a sawn theih nan social media kal tlang bakah thingtlang lamah zirtirna leh hmalakna hrang hrangte neiin a fehchhuak thin ang.