ORIENTATION WORKSHOP ON SWACHHATA GREEN LEAF

Dated Serchhip, The 20th August 2024: Vawiin khan Serchhip DC Pu Paul L Khuma chuan Serchhip District a khualbuk hrang hrang te inelna tur Swachata Green Leaf Ratings a hawng.

Pu Paul L.Khuma chuan Serchhip District chu District fai, hmun dangte tan pawha entawntlak an nih theihna turin mi tinin faina ngai pawimawh tur leh, an rilruah “Clean Serchhip” tih dah reng turin kalkhawm te a sawm. DC chuan Kristian kan nih ang pawhin kan thinlung, kan taksa leh kan chhehvel te kan tihfai hian Pathian min hnaihtir thin a ni, a ti a. Vawiin Swachata Green Leaf Ratings hawnna programme-a kalkhawm te chu an thil zir leh an hriatthar te chu faina kawnga hma an sawn theihna tura fuihtu leh tihphur tuah hmang turin a chah a ni.

Serchhip District chhungah hian khuanu duansa hmun mawi leh thlir chakawm tak tak, tualchhung leh ram pawn atanga khualzin te pawh hip thei tur hmun tam tak a awm a ni, DC chuan a ti a. Heng hmunhma nuam tak tak te hi a tlawhtu leh a neitu mipui ten an vawn thianghlim a pawimawh zia te; khual zin mi te thlen in -homestay, hotel, lodge leh rest house te pawh vawnfai a tul zia te; zin veivak ten riah an chakna leh tlawh nawn leh an chakna hmuna siam thei tu an nih dan te inhria a, tan la lehzual turin a fuih a. Swachata Green Leaf Ratings hman tan a nih dawn avangin tehfung hrang hrang te hre chiang a, ratings tha an neih theihna tura tan la turin Pu Paul L.Khuma chuan kalkhawmte a fuih a ni.

Swachata Green Leaf Ratings hi November 2023 khan Sawrkar Laipui Department of Drinking Water and Sanitation leh Ministry of Tourism tangkawp chuan kalpui tanin Travel for Life Campaign hnuaiah khualzin te chawlh hahdamna hmun endikna tura dan thar ni ta hi a duang chhuak a. Hotel, Resort, Homestay leh khualzinten thlenna hmun atana an hman zawng zawng, sawrkar leh mimal enkawl te chenin a huam vek a ni. Tourism Department nena tangkawpin PHE te chuan Serchhip District chhungah khualzin te thlenna hmun 26 an thlang chhuak a. Heng hmunhma nei tu leh enkawltute hi kokhawmin vawiin programme ah hian Swachata Green Leaf Ratings chungchang inzirtirna te, tehfung hrang hrang hmanga teh an nih dan tur te hrilhfiah an ni.

Khualzin te thlenna hmunhma te hi bawlhhlawh sakhat an sawngbawl dan (solid waste management), zun leh ek thli an thenfai dan (Fecal sludge management) leh choka/bathroom/insukna thli an tihfai dan (Greywater management) hmang tea teh an ni dawn a. SDO (Sadar) kaihhruaina hnuaiah verification team ten an endik dawn a ni.

Vawiin Swachata Green Leaf Ratings hawnna programme hi Pu Isaac Lalchhuanmawia, Sr. Executive Engineer, PHE chuan a kaihruai a. District Coordinator Pu Samuel Lallawmzuala chuan kalkhawm te hnenah Swachata Green Leaf Ratings awmzia leh tehfung hrang hrang te a sawifiah a. Additional DC Pu Lalrinzuala’n lawmthu sawiin Workshop hi a khar a ni.

DISTRICT COMMITTEE ON SWACHHATA GREEN LEAF RATING SYSTEM

Chairman :    Deputy Commissioner

Vice Chairman :  Project Director, DRDO

Member Secretary :  Sr. Executive Engineer, PHED

Members : 

1.Addl. Deputy Commissioner

2.Assistant Tourism Officer

3.District Coordinator, PHED

4.District Urban Development Officer, UD&PA

5.District Local Administrative Officer, LAD

6.President – Serchhip Joint VC, Sub-Hqrs: YMA & MHIP.

Swachhata Green Leaf Rating System kalpui dan tur hi chhawng thum (3) ah then niin:

1.Orientation Phase : Khualbuk siama sumdawng te kokhawma Swachhata Green Leaf Rating System chungchang inzirtirna leh inhrilhhriatna (Training/Workshop) neihpui leh faina kawnga staff te training pek a ni a.

2.Voluntary Declaration Phase :

Tunah hian second stage ah awm mek in, Khualbuk siamtu sumdawng te chuan endikna tur kaihhruaina hmangin mahni in an lo in endik (Self-assessment) an lo nei anga, mark an lo in pe ang. A ti chiang turin thlalak leh video submit tur an lo ruahman fel ang. Endikna format Current Certification Status (CCS) hmangin District Committee ah an thehlut ang. CCS Form thehluh hun tiam atan 15th September 2024 thleng hun hawn a ni.

3.Verification Phase :

District Committee in CCS form chu Verification Sub-Committee te endik turin a thawn ang. Verification Sub-Committee te hian Khualbuk enkawltute document thehluh te endikna hna an nei ang. Hei hian a hmuna endik (Site visit) pawh a huam ang. Edikna zawng zawng zawh fel a nih hnuah Rating Certificate hi District Committee in a pe chhuak ang. Khualbuk te chu an rating hmuh te chu Trip Advisory, OYO, booking.com etc. ah an tarlang thei tawh ang.

VERIFICATION SUB-COMMITTEE

Chairman :  SDO (Sadar)

Secretary :  SDO, PHED Serchhip

Members : 

1.Vice President Sub Hqrs YMA

2.Vice President Sub Hqrs MHIP

3.Assistant Receptionist, Tourist Lodge Serchhip