PWMU Seling kalpui dan tur chungchang inrawnkhawmna neih a ni

15th May, 2024 (Nilaini) hian Plastic Waste Management Unit, Seling khaw ramchhunga din thar tur chungchang thuah Thingsulthliah RD Block huamchhunga Village Council 11 hruaitute nen he project kalpui dan tur chungchang inrawnkhawmna hun Seling VC House-ah neih a ni a, he hun hi Er.H. Lallianmawia, Sr. EE, Rural Watsan Division, Aizawl chuan kaihruaiin, Project Director leh Project Manager tiamin PMU, PHED staff ṭhenkhatin hun hi an hmanpui bawk.

He hunah hian Aibawk PWMU project hmalaknaa PMU, PHED in Public Private Partnership (PPP) mode a hlawhtling taka a thawhpui mek Pu Laldinthara, CEO, Waste Tech & Bio-Energy chuan presentation neiin ruahmanna hrang hrangte bakah he project a hlawhtlin theihna tura hriat ṭulte, kal khawmte hnenah hian hrilhhriatna hun a nei a, hun hmanpuitu Er. H. Duhkima, Director, PMU chuan,‘Bawlhhlawh ṭawihtheilo vanga buaina namen lo kan tawh chhoh ṭan thute, a sawngbawlna la mumal loh vanga mipuite pawhin kan bawlhhlawh thehthang dan kan hriat mai loh vanga kan buai chhoh tak thute sawiin, chung thil kan hmachhawn ṭhinte vang chuan mumal zawka kan bawlhhlawh sawngbawl a nih theih nan he ruahmanna hi siam a ni a, a hlawhtlin theih nan chuan a hmaa ruahman a lo nih tawhna hmunah kalpui leh rel a ni a, a hlawhtlinna pawh ṭanrualna hmangin kan hmuh ngei kan beisei’ tiin a sawi.      

Programme pangngaia kalpui a nih hnuah khawtlang hruaitu kal khawmte nen Agenda chhawpchhuah hmangin thurel hona neih nghal a ni a, chung thurelte chu :-

1). Plastic Waste Management Unit kalpui dan tur chungchang.

2). Mipui inrawnkhawm hun tur chhung (Gram Sabha).

3). Khaw tinah Awareness neih dan tur chungchang tihte a ni.

Plastic Waste Management Unit, Seling hi Seling ramchhung ‘Kawipuia’ awm tura ruahman niin, a hmunhma pawh thlan fel a ni tawh a, project kalpui tura Department mala kal a harsat vangin PPP mode a thawhpui neia kal tura ruahman leh niin, Aibawk PWMU lama PMU, PHED in a thawhpui mek Waste Tech & Bio-Energy nena thawk dun tura ruahmanna hi siam leh a ni. Ruahman dan chuan he unit chhawrtu tur, Thingsulthliah RD Block huamchhung mipuite nen ṭangkawpa, a project hna kal thei tura ruahman a ni a, heng khua a huamte hnenah hian bawlhhlawh khawnkhawm hna kalpui tur niin, chhungtin hnenah thla khata an senso thawhkhawm tura ruahman a ni. Heng bawlhhlawh khawn hian ṭawihthei a huam tel lovang a, ṭawihtheilo chauh khawn tur a ni. PHE Dept. leh Rural Development Dept. te hmalaknaa thingtlang khuaa compost pit siam a nih tawh vangin Aibawk Rd Block huamchhung anga ṭawihthei bik hi khawn tel ngai lo leh buaina tling tawh lo tura ngaih a ni a, khaw tinah khawn hun bik duan a ni ang a, sanitation point siamin chutah chuan bawlhhlawh hi khaw mipuiten a khawn niah an lo dah mai ang a, hnawm phur motor rawn kal hunah chung bawlhhlawhte chu an rawn rut khawm ṭhin dawn a ni.

Thurel zinga khel hlawh tak pakhat chu bawlhhlawh thliarhran chungchang a ni a, bawlhhlawh hi a bawm hran emaw satha ip hranah ṭawihthei leh thei lo thliar hran mai tur niin, felfai takin Aibawk RD Block huamchhung mipuite pawhin an thliarhrang tawh a, khawtlang hruaitute kaihhruainain mipuiteah zirtirna lo pek tam nise, hun reilote chhung chuan an zawm ve mai theih rin a ni.     

Plastic sawngbawlna hmun hi a hmunhma buatsaih a nih chhungin khawtlang hruaitute chu mipuite rawn khawma Gram Sabha lo nei tura thuthlukna siam a ni a, Zirtirna (awareness) kalpui ngai kan awm a nih chuan a rang lamin in report ni sela, ‘ṭawihtheilo sawngbawlna hmun hi Thingsulthliah RD Block huamchhungah hian a hmun hi din ni sela, ruahmanna anga kalpui theih nise, department hmalakna tur hi ṭha kan ti e tiin thuthlukna siamin hun khar a ni.