INDIA RAM PUMA KHUALZINTE CHAWLHBUK HO FAINA LAMA ENDIKNA TUR DAN THAR INHRILHHRIATNA HUN HMAN A NI

PMU PHED

May ni 2,2024 (Ningani) khan Project Management Unit, PHE Department leh Tourism Department-te bul tumin India ramchhunga khualzinte chawlh hahdamna hmun,khualbuk hrang hrang ten faina lama an zawm tur tehkhawng pakhat rating system thar, Swachhata Green Leaf Rating (SGLR) chungchang inhrilhhriatna hun Orientation Programme on SGLR in hospitality facilities chu Aizawl khawpui chhunga hotel leh homestay hrang hrangte nen neih niin, Meeting Hall, Engineer-in-Chief Office, PHE Department-ah hun hi hman a ni a, he hun hi Er. Lalhmingliani Hmar, Secretary, PHED chuan kaihruaiin, PHED atangin Officials hrang hrang bakah Tourism Department atangin Pi Lalṭhakimi Pachuau, Joint Director leh staff ṭhenkhatten hun hi an hmanpui bawk.

Hun kaihhruaitu Er. Lalhmingliani Hmar, Secretary, PHED chuan “Mizoram pawhin khualzinte a hip chho ṭan ve meka, heng kan khualzinho lakah hian kan hotel leh homestay-te hian ramdang mi mikhualte lakah Mizoram hmaitlang lanna an nih vangin faina lama kan hotel hmunhmate kan buatsaih dan leh mikhual kan lo thlen dan hian thil tam tak a hril thei a, chuvang chuan he rating system thar hian faina lamah hmasawnna min neih lehzual tirtu nise, chumi piah lamah chuan khualzinte hian hnawmhnawk hrang hrang an hnutchhiah ve ṭhin a, chu thil chu mikhual kan lo thlen dan hmang pawhin zirtirna hrang hrang kan lo kalpui ve theih vangin kan khualbukte hian chanvo pawimawh tak an chang a ni tiin a sawi.” 

Swachhata Green Leaf Rating (SGLR) hi hi Department of Drinking Water and Sanitation leh Ministry of Tourism-in Travel for Life campaign hnuaia hmalakna thar a ni a, khualzinte chawlh hahdamna/thlenna hmun (hospitality facilities) hrang hrang resorts, hotel, homestay, dharmshala, adt hian faina lama kaihhruaina duante an zawm ṭhat leh ṭhat loh tehna tur a ni. Heng chawlhbuk thlanchhuahte hi pawl emaw mimal enkawl pawh a huam vek ang dawn a ni.

Er. Lalthantluanga Khiangte, Programmer, PMU, PHED in kalkhawmte hnenah SGLR chungchang hrilhhriatna hun presentation a nei

Heng khualbukte hi an tih ṭhat dan a zirin 1 leaf, 3 leaf leh 5 leaf ratings-te pek an ni ang a, chumi chu booking platform hrang hrang- bookings.com, OYO, trip advisor ang chi-ahte pawh tarlan a ni tawh dawn a, faina kawnga an dinhmun tehfungah hman a ni tawh dawn a ni. He hmalakna thar hi India ram state hrang hrangte rualin Mizoram pumpuiah kalpui chhoh tura ruahman mek a ni.