LAWNGTLAI-AH WORLD WATER DAY 2024 HMAN A NI

PHED Lawngtlai

Lawngtlai, Dt. 22.03.2024: World Water Day 2024 chu khawvel hmun dangte rualin Lawngtlai District ah pawh hman a ni a. A hmanna pui ber (main function) hi Dt. 22.03.2024 zingah Areopagy, Lawngtlai Bazarah neih a ni a. Khuallian tura beisei Lawngtlai DC chu rawlkhawlhna dang a neih avangin Er. Netralal Jaisi, Sr. Executive Engineer, Lawngtlai WATSAN Division chu Khuallian atan hman a ni. Khuallian hnen atang hian tui renchemna kawnga mipui pawimawhna te, Department leh mipuite thawhhona tha tak nei a, ke kan pen ho a tul thu ngaihthlakna neih a ni. He hun hi Central Young Lai Association (CYLA) hruaitute leh Mizoram Journalist Association(MJA) Lawngtlai hruaituten an hmanpui bawk a ni.

Aeropagy-a hun hman zawh a nih hnu hian World Water Day 2024 denchhenin rally neih chhunzawm a ni a. Pu C. Lalhruaitluanga, DIPRO Lawngtlai chuan he rally hi a vai liam a ni. He rally-ah hian town chhung Branch YLA members leh MJA Lawngtlai te pawh an tel thei a ni.

World Water Day 2024 denchhen vek hian Dt. 20.3.2024 khan ‘Inrem Nan Tui’ tih thupui a hmangin Talk Show Skynet Studio-ah buatsaih a ni a. Zohlimpuii Chhakchhuak-in he Talk Show hi kaihruaiin, Lai Autonomous District Council (LADC), Forest Department (Gov’t of Mizoram) leh Gov’t Lawngtlai College a mithiam sawm bik te nen he hun hi hman a ni.

World Water Day pual hian Lawngtlai khawpui tui lakna leh chawmtu ber Chengkawl lui hnar leh Chengpawngli tihfai hnatlang neih a ni bawk a. Pu L. Sangromuana, SDO, Lawngtlai WATSAN Sub-Division chuan fuihna thu tawi sawina neiin, tui thianghlim leh hmantlak kan neih zel theih nan midangte zirtirna leh hrilhhriatna kawngah tan la thar turin kalkhawmte fuihna a nei. Sanitation Department LADC, CYLA aiawh te leh DIET Lawngtlai zirlaite nen he hnatlang hi thawh a ni.