Swachhagrahi-te kaihhruaina in Mizoram khaw hrang hrangah One Day Seminar neih a ni
December thla aṭang khan Swachhagrahi-te buatsaihin Mizoram chhung khaw hrang hrangah ‘Tui leh Faina’ chungchang One Day Seminar neih a ni a, he seminar hi Mizoram chhung Swachh Bharat Mission (Grameen) in a huam chin khua 501 ah neih niin, khawtlang hruaitute leh Watsan Committee-te nen hlawkthlak taka hun hman a ni. Mahni khawtlang ṭheuha tuihna humhalh leh tui sem chungchanga inrelbawlna ṭha zawk a awm theihna tur bakah khawtlanga fainain hma a sawn theih nan hmalakna tur hrang hrangte an chhawpchhuak nghal bawk.
Report aṭanga a lan danin he seminar a tel zawng zawngte hi an vaiin mi 8814 an ni a, remchan dan angin mahni khua community hall leh VC House ahte he hun hi hman niin tunah hian seminar hi heng khuaah te hian zawh fel vek tawh a ni a, ruahmanna an neih angte pawh bawhzui chhoh nghal a ni.
Mizoram chhung khaw tam zawk ODF + model village a puan a nih hnuah khawtlang hruaitute hian he model village nihna vawnhim lamah hian mawhphurhna hrang hrang khawtlang mipuiten an neih chu inhrilhhriat thar ṭha an ti a, tuichhe luanral danah te, bawlhhlawh ṭawihthei ho chu leiṭha siamna atana hman a ṭhat mai thu leh khawtlang mipuite chu bawlhhlawh nei tlem turin khawsak rel thiam a pawimawhna lamah inzirtirna kalpui ni sela, hei bakah hian vantlanga inthiarna him leh ṭha nei vek tura hmalaknate, khur hnih nei inthiarna siam a pawimawhnate, polythene hmang tlem tura inzirtirnate, kut sil fai ṭhat a pawimawhnate bakah khawtlang fai leh hrisel zawk ni turin naupang aṭanga zirtirna kan ṭan a a ngai, a nihna takah erawh chuan puitling hian faina lamah hian thuawih kan harsat zawka a lan thute sawiin faina chungchangah chuan kan zavai huap thil a ni a, ṭanruala hma kan lak a ngai tak meuh meuh thute sawiin hun an hmang a ni.
Faina bakah hian khawtlang tui lak chungchangah pawh zirtirna hun hmangin ruahtui khawl pawimawhnate, tui ren tura inzirtirnate, tuihna humhalh leh tui quality test chungchang leh an khawtlang ṭheuha tui sem dan fel zawkte relin hun an hmang bawk. Heng an hun hman dan zawng zawng bakah hian ṭul dang an tih khawtlang faina leh tui lak chungchang thuah bawhzui ngai an neih hrang hrangte bawhzui hna thawk turin thuthlung an siam bawk a ni.
Hmun hrang hrangah chuan an khaw bialtu Junior Engineer, PHED ten he hun hi an hmanpuia, tui pump-na khawl chungchanga hriattur pawimawh hrang hrang inhrilhhriaṭna hun leh ṭul dangte sawiin hun an hmang ve bawk.
