FAINA HNATLANG

A hun : Sahmulphah Thla ni 8,2022 (Thawhlehni) chawhma dar 9:30
A hmun : MINECO Zawlzau (Open Gym bul).
Vailiamtu : Minister, Health & FW Department.
Kaihruaitu : Prof. Lalnuntluanga, Gen.Secretary, CYMA
Thusawi : Pu R.Lalngheta, President, CYMA.
Thusawi leh Vailiamtu : Dr.R.Lalthangliana, Minister, Health & FW Department.

PHED leh CYMA hian, ‘Kan rama tuihna humhalh leh a awmsa tihpun’ thupuia neiin kum 2012 khan thawhdunna thuthlung (MoU) an lo siam tawh a. Mipui zirtirna nasa takin a kalpui a. Group leh Branch YMA te tuihna humhalh tha inelna thianghlim kumtin a buatsaih thin a ni. CYMA chuan a thathawh lamah tan an la, Department lamin a remchan angin sumin a pui thin a ni. Hei hian kan ramah tuihnar leh lui tui humhalh duhna mipui thinlung nasa takin a kaiharh a, mahni khaw tuilak hnar huam chhunga mimal ram neituten tuihna tha zawka humhalh a nih theih nan vantlang tan ram pe let khaw tam tak an awm a ni. Tuihna tipunga ruahtui luang ral chelh ding turin tui kuang ramah thing phun a ni a, leirit khuarin khurte laih a ni a. Tuihnar huam chin ram bial chu ramri siamin Thing lak khap tlat a ni a, Thingro tlu takngial pawh lak phal a ni lo hial a ni. PHED & CYMA ten thawhdunna nghet tak leh tha em em mai an neih avang hian India rampui tuihna humhalh tha khua thlanah pawh Mizoram khua, heng Leng khua, Ailawng leh Sialsir khua te hi thlan an lo ni tawh nghe nghe a ni.

He thawhdunna boruak hi a tha em em a, a chhawrtu chu Mizoram mipui an nih avangin kum 2017 khan ‘ Fai leh Thianghlim’ kawngah thawhdunna thuthlung (MoU) an lo siam leh ta a ni. Hei pawh hian mipui zirtirna uar takin a kalpui a, YMA inkhawmpui hrang hrangah sawi a ni a, thuziak sem leh thutar hmang te, sawihona huaihawt thin a ni. Heng video hmanga puandarh te, auhla in elna te, inhnial fiam leh ni bik hmang te pawhin zirtirna nasa taka kalpui a ni. Heng kan tanlakna avang hian India ram khawfai inelna (Swachh Survekshan Grameen)ah hian kum 2019 khan North East Zone-ah lawmman pakhatna Mizoram chuan alo dawng tawh a, kumin 2022 hian lawmman pahnihna kan dawng leh ta a ni.Tun tum Faina Hnatlang ah hian City Branch 108 lo thawkchhuak tura beisei anni a, bawlhhlawh paih motor 407 sawmhnih pahnih (22) rawih a ni bawk ang. Aizawl khawchhung leh a chhehvel hmun ruk (6) hrut chhuak turin ruahmanna siam a ni. A huhoa hnatlan na turte chu:
i. Aizawl helna kawng (Aizawl bypass road) Chite lei atanga Silaimual
ii. Mualdungsei atangin PTC peng.
iii. MINECO (Gate No 1 atanga Gate No. 2)
iv. Tlawng kawng (Mission Vengthlang atanga Dihmunzawl)
v. Durtlang Leitan atanga Bawngkawn
vi. Durtlamg Leitan atanga Sihphir (Sakawrhmuituaitlang)
YMA Branch hrang hrang bakah hian PHED lama Officer leh Staff te pawn he hnatlang hi an telpui bawk ang.
Kan lawmna ber chu Mizoram mipuiten faina kawngah hmalam kan pan ta hi a ni. Kan tuihnar leh lui tui tihbawlhhlawhtu kan vei tan ta ! Kan ramngaw dimdawihna chang kan lo hre thar ta mek bawk. Kan thlen china hmasawn zel tur erawhchu kan ni. Tun tum Faina Hnatlang pawh hian Aizawl leh Zoram mipui te faina kawngah min tiharh zualtu lo ni mawlh rawh se.